اسلام عبدالله-فائدة علامة ‘ للدلالة على ورقة العمل

السلام عليكم ورحمة الله وبركاته
“أولا اللى يطبق ورايا يطبق على نفس اسم الشيتات زى ما أنا كاتبها عشان المعلومه توصل صح”
بسم الله الرحمن الرحيم
قد يلاحظ بعضنا عند الاشاره الى خليه ورقة عمل محدده تظهر لنا على شكلين
الشكل الاول هكذا

لاحظ سوا كدا اتكتبت Sheet!A1 من غير علامة ‘
طب نيجى نكتب علامة ‘ قبل وبعد اسم الشيت كدا ‘Sheet1’ وبعد ما نضيفهم اضغط Enter ايه اللى حصل
هتلاقى اللى حصل ان العلامه ‘ اختفت تانى ورجع الاسم بالشكل دا Sheet!A1
واحد هيقولى دلوقتى يعنى ملهاش لازمه وانت بتهرى فى الفاضى
طب اسمع منى للاخر
هيا عامله زى رقم صفر , ازاى دا !
أيوه عشان رقم صفر ملوش لازمه على الشمال بس ليه لازمه لو يمين الرقم , هتقولى وانا افهم ايه يعنى من الشمال واليمين دا
لا انا مش بحب حد يستعجلنى , انا اشرح براحتى عشان انا مستعجل
دلوقتى العلامه دى ليها لازمه لما اعمل مرجع من صفحه يكون اسمها مكتوب فيه مسافه
يعنى دلوقتى نروح للشيت اللى عملنا عليه مرجع دا اللى هو Sheet1 ونعمل مسافه قبل رقم واحد مثلا فيكون كدا Sheet 1
عملنا المسافه نرجع نشوف بقى المعادله بقت عامله ازاى

نلاحظ ان علامة ‘ اضافت قبل وبعد اسم ورقة العمل واحد هيقولى
اللى هو هو نفس الواحد اللى قالى قبل كدا انها ملهاش لازمه بيقول هشيل العلامه دى ‘ منها عادى
طب روح شيلها كدا وشوف ايه اللى حصل
طبعا جالك خطأ يعنى دلوقتى لما يكون فيه مسافة فى اسم ورقة العمل
يبقى عشان الاكسل يتعرف على الاسم بنكتب العلامه دى ‘ قبل وبعد الاسم
وبعد كدا علامة التعجب ! اللى هيا بتعرف الاكسل ان الاسم دا من ورقة عمل كذا
انما العلامه دى ‘ دورها فقط هو احتواء اسم ورقة العمل
لكن لما يكون الاسم مفيش فيه مسافات اصبح استخدام العلامه دى ‘ ملهاش لازمه
فالاكسل بيشلها لوحده زى ما بيشيل الصفر من شمال الرقم
ولكن ليس خطا بل يفضل استخدمها فى المعادلات لاحتواء اى اسم لورقة العمل سواء فيه مسافه او لأ
وبكدا يكون درس النهارده انتهى
واحد هيقولى اللى هو هو نفس الواحد برضوا يعنى كل الكلام دا عشان تقول المعلومه دى
انا حر ياعم انا احب ادى لاى حاجه حقها والوقت بتاعها
كان معكم اسلام عبدالله من قناة المهندس الاول وإلى اللقاء