كتابة أول كود فى C++

السلام عليكم ورحمة الله وبركاته
أهلا بكم اخوانى الكرام فى الدرس الثانى فى لغة الـ C++

اليوم هنكتب أول كود لنا فى الـ C++ وهو رسالة الترحيب
يعنى عندنا رسالة وعايزين نطبعها​

بدايةً استخدم الكومبايلر الذى تراه مناسباً لك أما أنا فسأستخدم الـ Qt

ومجرد تسطيبك لكومبايلر C++ ستكون المنصة جاهزه لكتابة الكود

“اللى لسه مسطبش كومبايلر وعايز يتابع معايا فيه مواقع IDE Online للـ C++“
“دا موقع خفيف ويفى بالغرض من هنا“

وتفتح مشروع جديد بكلمة New project ومن ثم نكتب الكود التالى

#include <iostream>
using namespace std;

int main()
{
cout<<"welcome to Alsaqr training academy\n";
    return 0;
}

 

نضغط Run بعدها سيكون الناتج هو السلسلة النصية “welcome to Alsaqr training academy”
هذا شكل الكود وطباعة النتيجة داخل منصة الـ Qt

نبدأ بسم الله شرح أسطر هذا الكود “جزء جزء“

#1 الجزء الأول

#include <iostream>

معناه ايه ياسولوم السطر دا ، معناه استدعاء لمكتبة اسمها iostream بنستدعيها بالامر include
طب وعلامة الهاش دى # معناها ايه ، معناها انك لما تستخدم الامر include للمكتبه الفولانيه علامة
الـ # تقوم باستبدال ذلك السطر للكومبايلر ببعض الأسطر “أو الأكواد أو الشفرات” المخزنة داخل هذه المكتبة

طيب وليه اصلا بنعمل استدعاء للمكتبه دى ، لان الاوامر مثل امر cout المستخدم فى الكود اعلاه وغيره
الكومبايلر مش بيتعرف عليه فلازم نعرف الكومبايلر اننا هنستخدم المكتبة اللى محتاجين الاوامر اللى بداخلها
بحيث يتعرف الكومبايلر على الاوامر اللى هتكتبها بعد كدا داخل هذه المكتبه
وكل مكتبه ليها محتوايتها اللى هنحتاجها بعد كدا

………………………………………………………………………………………..

#2 الجزء الثانى

using namespace std;

معناه ايه ياسولوم السطر دا ، جملة std المقصود بيها “C++ Standard Library header files”
حمادة بيقولى مش فاهم حاجه ، شوف ياحمادة ببساطة كدا السطر دا عبارة عن اعلان عن مكتبة الملفات الأساسية أو الرئيسية
يعنى ايه برضوا ، المكتبة Standard والتى تكتب فى الكود std دى المكتبة القياسية فى الـ C++
المكتبة دى عباره عن مجلد بداخله كل المكتبات اللى بنستخدمها واللى منها iostram
يبقى عشان نوصل للمجلدات أو المكتبات التى بالداخل لازم نخبط على باب البيت الأول
واللى هو std ومن ثم افتح الأوضه اللى محتاجها مثل الـ iostram

تمام كدا أحماده ، تمام مستر اسلام
طيب لو عايز تتعرف على بقيت المكاتب ممكن تلقى نظرة على الرابط التالى من هنا

س سؤال هل ممكن استغنى عن السطر التانى دا
ج جواب اه ممكن بس هتتعب ، طب ازاى ناخد مثال اكتب الكود التالى

#include <iostream>
//using namespace std;

int main()
{
std::cout<<"welcome to Alsaqr training academy\n";
    return 0;
}

 

هنا عملت علامتين Slash // عشان يكون السطر التانى مجرد تعليق للقرائه ولا يكون له تأثير بالكود
بس كتبت قبل الامر cout كالتالى std::
يعنى عشان استخدم كل امر لازم اعرفه الملف الـ Header files الخاص بيه قبله كدا
أيوه ياحماده عشان كدا قولتلك هتتعب يبقى نريح دماغنا ونعلن عنه بسطر واحد بالأعلى وننهى الأمر
<بالنسبة لعلامة ; نهاية الجملة نتاول شرحها فى الجزء الرابع ادناه>
………………………………………………………………………………………..
#3 الجزء الثالث

int main()
{

}

وهى الدالة Main ودى بقى هيا الدالة الرئيسية
وهيا الدالة المسئولة عن تنفيذ الكود بداخلها خطوة خطوة سطر سطر (الحب الحب بوليبيف بوليبيف)

ولازم تكون بالاسم Main بعد ذلك سمى ما بدى لك ودا هيوضح أكتر لما نوصل لدروس الـ Functions

وقبل Main مكتوب int ودا معناه ان الدالة دى نتيجتها فى الاخر من النوع integer
أى العدد الصحيح وهنتوسع فى الموضوع دا فيما بعد أكثر بإذن الله

وبعد Main فيه قوسين بهذا الشكل () وهنا تكون فارغة
وهو مكان الـ Parameters أى معاملات الدالة وهذا أيضا سيتضح فى دروس الـ Functions

وأخر جزء فيها هو الـ Blocks وهما الأقواس المعقوفة {} وتستخدم لإحتواء اسطر الكود الخاصة بالدالة

………………………………………………………………………………………..
#4 الجزء الرابع

cout<<"welcome to Alsaqr training academy\n";

وهذا الأمر cout مهمته هو طباعة الكود بعد علامتى >>
وبما اننا بنكتب نص فلازم يكون بين علامتى التنصيص “”

وأخر النص نلاحظ انى كتبت الرمز \n فما معناه ، معناه هو انه بعد ما يطبع النص اعلاه هيضيف سطر
ودا عشان العرض يكون واضح ومرتب كدا (نضافة ريحة توفير)

ونلاحظ كذلك انى كتبت علامة “Semicolon” ; فى نهاية السطر “اللى هيا بحرف الكاف باللغة الإنجليزية”
وتكتب أخر كل سطر للكود الذى يؤدى وظيفة محددة وهو جزء من شكل الكود “Syntax” فى اللغة
وتفيد بأن نهاية السطر للكود البرمجى ينتهى عند تلك العلامة ;

………………………………………………………………………………………..
#5 الجزء الخامس والأخير

return 0;

ودا بنستخدمه لانهاء البرنامج ويلاحظ بشكل أكبر مع العمل على الواجهة الرسومية Gui اللى هو الفورم
“أما الـ IDE هو الواجهة الكتابية”
ودا معناه انتهاء البرنامج بشكل عادى أى بدون مشاكل
………………………………………………………………………………………..
وبكدا يكون درس اليوم انتهى
مع تحياتى أخوكم فى الله اسلام عبدالله